வய(து)தில் மாற்றம்

5 வயதில் தமிழ் படித்தேன் என் தாயிடம்
15 வயதில் தமிழ் கவி வடித்தேன் உன்னிடம்
25 வயதில் தத்துவம் பேச வைத்துவிட்டாய் பிறரிடம்

பாலைவனப் பறவை

உலகில் பாலைவனம்
எப்படி வந்தது?
அதுவும் காதலித்து
தேகச் செழிப்பு இழந்ததா?
என்னைப்போல..!!

உன் கருங்குழல் கலைத்து
வீசும் தென்றல் குளிர்ந்து
பொழிகிறது - இந்த
பாலைவனப் பறவைக்குள்
மழையாய்..!!

கனடாவில்

தொலைவாகிப் போன
உன் முகத்தை பார்க்கிறேன்
கனடாவில் பௌர்ணமியாக..!

கனடாவில் சூரியகாந்தி
மலர்வதில்லையாம்
நிலவுனக்கு ஒளிகொடுத்து
சூரியன் அணைந்துபோன
புதிய விஞ்ஞானம்
எழுதப்படுகிறது இங்கே..!

நிலவும் சூரிய குடும்பம்

தொலைவில் நின்றபோது
நிலவானாய் எனக்கு
நெருங்கி உனைத்தொட்டபோது
சுட்டது உன் விழிகள்
ஓ...
மறந்துவிட்டேன்
நிலவும் சூரிய குடும்பம்தானே..!

தமிழிலும் வல்லினம்

உன்னைக் கண்டபோது அறிந்தேன்
தமிழின் அழகை
உன் சிரிப்பொலி கேட்டபோது தெரிந்தேன்
தமிழிசையின் இனிமை
உன்னைத் தொடர்கையில் புரிந்தேன்
தமிழின் இடையினத்தை

மெல்லினத்தில் ஓர் கடிதம் வரைந்து;
உன்னிடம் தந்தபோதுதான் உணர்ந்தேன்
தமிழிலும் வல்லினம் உள்ளதென்பதை..!